Joshua Kiziba

Rais wa Jamhuri ya Muungano wa Tanzania, Dkt. Samia Suluhu Hassan ameelekeza fedha zilizokuwa zimepangwa kugharamia maadhimisho ya Sherehe za Muungano mwaka huu, zitumike kwenye shughuli za maendeleo, ikiwemo kukarabati miundombinu ya barabara iliyoharibiwa na mvua zinazoendelea kunyesha nchini.

Hayo yameelezwa na Waziri Mkuu, Dkt. Mwigulu Nchembaleo ofisini kwake Mlimwa jijini Dodoma alipokuwa akiuarifu umma kuhusu maadhimisho ya Miaka 62 ya Muungano wa Tanzania yatakavyofanyika.

“Maadhimisho ya Sherehe za Miaka 62 ya Muungano yatafanyika katika ngazi ya mikoa yote nchini ambapo viongozi wakuu wa kitaifa watafanya shughuli za kutembelea, kuweka mawe ya msingi na kuzindua miradi ya maendeleo,” amesema Dkt. Mwigulu.

Aidha, amesema imeelekezwa kuwa wakuu wa mikoa watembelee, waweke mawe ya msingi na kuzindua miradi ya maendeleo pamoja na kushiriki shughuli za usafi wa mazingira, kupanda miti na kufanya mashindano ya michezo mbalimbali.

Shughuli nyingine zitakazoambatana na maadhimisho hayo ni mashindano ya michezo na sanaa mbalimbali, mashindano ya uandishi wa insha kwa shule za msingi na sekondari, mahojiano maalum na wazee maarufu, midahalo na makongamano kuhusu muungano na hatua ya maendeleo iliyofikiwa hadi sasa.

Kaulimbiu ya maadhimisho hayo ni: “MIAKA 62 YA MUUNGANO: AMANI, UMOJA NA MSHIKAMANO NI MSINGI WA MAENDELEO ENDELEVU.”

Mwanza: Kwa mara ya kwanza katika historia yake, Hospitali ya Rufaa ya Kanda ya Bugando imefanikiwa kufanya upasuaji wa upandikizaji figo, hatua inayofungua ukurasa mpya wa huduma za kibingwa bobezi kwa wakazi wa Kanda ya Ziwa.

Upasuaji huo wa mafanikio umefanyika kwa mgonjwa mwenye umri wa miaka 40 (mwanaume), mkazi wa Mkoa wa Mwanza, kwa ushirikiano wa karibu kati ya wataalamu wa Hospitali ya Bugando na timu ya wataalamu kutoka Hospitali ya Benjamin Mkapa (BMH) na Chuo Kikuu cha Dodoma (UDOM).

Akizungumza mara baada ya zoezi hilo, Mkurugenzi Mkuu wa Hospitali ya Bugando, Sr. Dkt Alicia Massenga, amesema hatua hiyo ni mafanikio makubwa kwa sekta ya afya nchini, na serikali kwa ujumla.

“Leo Bugando imeandika historia, kuanzishwa kwa huduma hii ya upandikizaji figo ni mkombozi kwa maelfu ya wananchi wa kanda hii, maandalizi yalikua ya muda mrefu lakini leo hii tumefanikiwa kufanikisha zoezi hili,” amesema.

Sr. Massenga ameongeza kuwa mafanikio hayo yametokana na uwekezaji kwa ushirikiano wa Baraza la Maaskofu (TEC) na Serikali katika miundombinu, vifaa, na mafunzo kwa wataalamu.

“Huu ni uthibitisho kuwa ushirikiano baina ya hospitali hizi unaokoa maisha ya Watanzania. Tunakusudia kufanya upandikizaji kwa wagonjwa wengine hapa Bugando kuanzia sasa, tunawakaribisha sana kwa huduma hii,” ameongeza.

Kwa upande wake kiongozi wa timu kutoka Benjamini Mkapa, Prof. Masumbuko Mwashambwa,  Daktari Bingwa wa Upasuaji kutoka UDOM na pia kiongozi wa timu ya upandikizaji figo katika Hospitali ya Benjamini Mkapa Dodoma akiiwakilisha Timu hii ya wataalamu amesema, wapo tayari kuendelea kushirikiana na Bugando wakati wote.

Serikali imeweka kipaumbele kikubwa katika ajira katika mwaka 2026/27, ambapo jumla ya nafasi mpya 45,000 zinatarajiwa kujazwa ili kupunguza upungufu wa watumishi katika taasisi mbalimbali za umma.

Sambamba na hilo, vibali vya ajira mbadala 7,124 vitatolewa kuhakikisha utendaji kazi haukwami pindi watumishi wanapoondoka kazini kwa sababu mbalimbali.

Katika kulinda haki za watumishi, serikali imepanga kuhakiki na kuidhinisha madai ya malimbikizo ya mishahara katika taasisi 425, pamoja na kushughulikia madai ya wastaafu na waliokoma utumishi kutoka kwa waajiri 200. Pia, usimamizi wa malipo ya mishahara utaimarishwa katika taasisi 510 ili kuhakikisha malipo yanafanyika kwa wakati na kwa usahihi.

Kwa upande wa maboresho ya mifumo ya kiutumishi, serikali itafanya uhakiki wa watumishi (staff audit) katika taasisi 127 zinazotumia mfumo wa e-Watumishi, huku taasisi 35 ambazo bado hazijaanza kutumia mfumo huo zitawezeshwa kujiunga nao. Maboresho zaidi yatahusisha kuimarisha teknolojia ya mfumo huo na kuunganisha na mifumo mingine ya serikali pamoja na sekta binafsi.

Aidha, serikali imepanga kuanzisha mfumo maalum wa “dashboard” utakaokusanya na kuwasilisha takwimu sahihi kutoka mifumo mbalimbali ikiwemo e-Watumishi, e-Msawazo, e-Utendaji na Watumishi Portal, hatua inayotarajiwa kuboresha maamuzi ya kiutendaji katika ngazi zote za serikali.

Mpango huo unaonesha dhamira ya serikali ya kuendelea kuboresha utumishi wa umma kwa kuweka mifumo madhubuti, kuongeza ajira na kuhakikisha watumishi wanapata stahiki zao kwa wakati.

Rais Dkt. Samia Suluhu Hassan ametunukiwa tuzo maalum ya Ubinadamu ya Upasuaji wa Ubongo kutokana na mchango wake mkubwa katika kuimarisha sekta ya afya nchini.

Tuzo hiyo imetolewa leo na Rais wa Chama cha Madaktari wa Upasuaji wa Ubongo, Mgongo na Mishipa ya Fahamu Tanzania, Dkt. Othman W. Kiloloma katika Mkutano wa Pili wa Kimataifa wa Shirikisho la Jumuiya ya Madaktari wa Upasuaji wa Ubongo, Mgongo na Mishipa ya Fahamu (WFNS) alioufungua jijini Dar es Salaam.

“Kwa niaba ya chama cha wataalam wa upasuaji wa ubongo na mgongo tunakutambua na kukushukuru kwa mchango wako mkubwa wa ubinadamu, ni heshima yangu kubwa kukukabidhi tuzo ya ubinadamu ya upasuaji wa ubongo, hongera sana,” amesema Dkt. Kiloloma.

Amesema kuwa, kupitia uwekezaji uliowekwa na Serikali ya awamu ya sita katika huduma za kibingwa na ubingwa bobezi, ujenzi wa rasilimali watu na uimarishaji wa huduma za vipimo, dharura na bima ya afya kwa wote umeokoa maisha na matumaini ya maisha ambayo wengine hawakuwa nayo.

Akizungumza Rais Samia amesema katika miaka mitano iliyopita kazi kubwa iliyofanyika imeleta matokeo ambapo hospitali zinazofanya upasuaji wa kibingwa wa ubongo, mgongo na mishipa ya fahamu zimeongezeka kutoka 2 hadi 7, madaktari bingwa wa upasuaji wa ubongo, mgongo na mishipa ya fahamu wameongezeka kutoka 12 hadi 37, na serikali imeongeza kwa kiasi kikubwa vifaa muhimu kama MRI, CT-Scan na X-ray.

Aidha, amesema tuzo huyo ni heshima kwa Watanzania wote na ameahidi kuwa serikali itaendelea kushirikiana na taasisi za kikanda na kimataifa kuimarisha huduma za afya kwa kuzifanya kuwa bora, nafuu na za uhakika ili kuokoa maisha ya wananchi na kurejesha tumaini kwa jamii.